თავის რუსული ბალალაიკის იქით ვერაფერს ხედავენ და მსოფლიო პოლიტიკის ანალიზს არ აკეთებენ. ჩინეთთან თანამშრომლობს მსოფლიოს ყველა სახელმწიფო და სტრატეგიული თანამშრომლობა აქვს მათ შორის, ძალიან მკვეთრი კონკურენციის ფონზე აშშ-საც და ევროკავშირსაც, - ასე ეხმიანება ჩინეთთან სტრატეგიული პარტნიორობისა და ირაკლი კობახიძის ჩინეთში ვიზიტის თაობაზე ოპოზიციის კრიტიკას საპროცედურო საკითხთა და წესების კომიტეტის თავმჯდომარე ირაკლი ქადაგიშვილი.

მისივე თქმით, ჩინეთთან სტრატეგიულ პარტნიორობაზე ოპოზიციის განცხადებები არის „ქვიშაზე დაწერილი პროპაგანდა, რომელიც დრომ წაშალა“.

„კანდიდატის სტატუსის მონიჭებამდეც გააფთრებული პროპაგანდა ჰქონდა ამის გარშემო ოპოზიციას ატეხილი, რომ ჩინეთთან სტრატეგიული პარტნიორობის გაფორმება ევროკავშირთან გზის ჩაკეტვას ნიშნავს. დავინახეთ, რომ ყველაფერი ამის საწინააღმდეგოდ არის. არ ვიცი - სრული დეფიციტი აქვთ ინფორმაციის და ამ თავის რუსული ბალალაიკის იქით ვერაფერს ხედავენ და მსოფლიო პოლიტიკის ანალიზს არ აკეთებენ. ჩინეთთან თანამშრომლობს მსოფლიოს ყველა სახელმწიფო და სტრატეგიული თანამშრომლობა აქვს მათ შორის, ძალიან მკვეთრი კონკურენციის ფონზე აშშ-საც და ევროკავშირისაც. აქედან გამომდინარე, საქართველოსთვის იმის აკრძალვა, რომ ჩინეთთან თავის ურთიერთობა, თანამშრომლობა და ეკონომიკური პერსპექტივა, რაც ყველაზე მნიშვნელოვანია, არ გააღრმაოს, არის ნაკარნახევი ან სრული არაკომპეტენტურობით ან მიზანმიმართული ტორპედირებით იმისა, რომ ჩინეთთან ეკონომიკური თანამშრომლობის გაზრდა გაზრდის ეკონომიკას და კეთილდღეობას, რაც მათი გაგებით მიუღებელია, რადგან მათი რევოლუციური სცენარი ვერ განხორციელდება. ეს არის ქვიშაზე დაწერილი მათი პროპაგანდა, რომელიც როგორც მრავალი სხვა, ასეთი დესტრუქციული განცხადება, დრომ წაშალა ,“ - განაცხადა ქადაგიშვილმა.