იემენში, „ჰუსიტების“ ობიექტებზე დარტყმები ღაზის სექტორში მიმდინარე ომის კიდევ ერთი მძიმე შედეგია, - ამის შესახებ გაერო-ს გენერალური მდივნის მოადგილემ ჰუმანიტარულ საკითხებში და გადაუდებელი დახმარების კოორდინატორმა, მარტინ გრიფიტსმა განაცხადა.

მისი თქმით, არც ერთ მხარეს არ ადანაშაულებს, თუმცა იმედის გამაცრუებელია ის, რაც იემენში ხდება.

„ეს კიდევ ერთი საშინელი შედეგია. ღაზაში ომის მართლაც მძიმე შედეგი", - აღნიშნა მარტინ გრიფიტსმა.

შეგახსენებთ, გასულ კვირას შეერთებულმა შტატებმა და გაერთიანებულმა სამეფომ იემენში, „ჰუსიტების“ სამიზნეებს დაარტყეს, რაც იყო პასუხი იმ თავდასხმებზე, რომელსაც ირანის მიერ მხარდაჭერილი დაჯგუფება წითელ ზღვაში სავაჭრო გემებზე ახორციელებს. ამასთან, გუშინ გავრცელდა ინფორმაცია, რომ აშშ-ის მოიერიშე თვითმფრინავმა ხომალდსაწინააღმდეგო ფრთოსანი რაკეტა ჩამოაგდო, რომელიც აშშ-ის სამხედრო-საზღვაო ძალების გამანადგურებლის მიმართულებით იემენის „ჰუსიტების“ მიერ კონტროლირებადი ტერიტორიიდან გაუშვეს.