ატომური ენერგიის საერთაშორისო სააგენტოს გენერალური დირექტორი, რაფაელ გროსი უახლოეს მომავალში ზაპოროჟიეს ატომურ ელექტროსადგურს, კიევსა და მოსკოვს ეწვევა, - ამის შესახებ გროსიმ ჟურნალისტებს განუცხადა.

ატომური ენერგიის საერთაშორისო სააგენტოს გენერალური დირექტორის ზაპოროჟიეს ატომურ ელექტროსადგურზე ვიზიტი სააგენტოს ექსპერტების შემდგომ როტაციას უკავშირდება, კიევსა და მოსკოვში დაგეგმილი შეხვედრების დროს კი ის ატომური ელექტროსადგურების უსაფრთხოების საკითხებს განიხილავს.

„ვაპირებთ საკადრო მორიგ, მე-16 როტაციას, ამიტომ მივდივარ რამდენიმე ექსპერტთან ერთად. გავესაუბრები სადგურის რუსულ „ხელმძღვანელობას“, ვნახოთ როგორ წყდება წყლის პრობლემა (სადგურის გაგრილებისთვის) გასულ ზაფხულს კახოვკას კაშხლის განადგურების შემდეგ“, - აღნიშნა გროსიმ.

ატომური ენერგიის საერთაშორისო სააგენტოს გენერალურ დირექტორს ჟურნალისტებმა სთხოვეს, ზაპოროჟიეს ატომური ელექტროსადგურის უსაფრთხოება ათბალიანი სისტემით შეეფასებინა, რაზედაც გროსიმ უპასუხა, რომ არის დღეები, როდესაც თითქმის 10-ია და არის დღეები, როდესაც არაფერი არ ხდება. „პრობლემა სრულ გაურკვევლობაშია, რადგან ეს ომია“, - აღნიშნა ატომური ენერგიის საერთაშორისო სააგენტოს გენერალურმა დირექტორმა.