უკრაინამ, შესაძლოა, დამატებითი „ბონუსები“ მიიღოს, დაველოდებით - ამის შესახებ უკრაინის ეროვნული უსაფრთხოებისა და თავდაცვის საბჭოს მდივანმა, ოლექსი დანილოვმა ამერიკული F-16 გამანადგურებლების უკრაინისთვის მიწოდების საკითხზე კომენტირებისას განაცხადა.

მისი თქმით, დასავლელი პარტნიორების მიერ უკრაინელი მფრინავების მომზადება გეგმის მიხედვით მიმდინარეობს.

"ვფიქრობ, რომ იქნება გარკვეული დამატებითი ბონუსები რაც შეეხება ამ კონკრეტულ მიმართულებას - თვითმფრინავის მიმართულებას. დაველოდებით", - განაცხადა დანილოვმა.

მისი თქმით, საბრძოლო თვითმფრინავებისთვის ინფრასტრუქტურის მომზადება გრძელდება და ამაში ქვეყანას პარტნიორები ეხმარებიან.

"ტექნოლოგია არ არის მარტივი, ის კომპლექსურია. გეგმა, რომელიც არსებობს, ესმის სამხედროებს, ჩვენი ქვეყნის უმაღლეს სამხედრო-პოლიტიკურ ხელმძღვანელობას. ის ახლა მუშაობს", - დასძინა დანილოვმა.

შეგახსენებთ, 2023 წლის დეკემბერში, ნიდერლანდების პრემიერ-მინისტრმა, მარკ რუტემ განაცხადა, რომ ნიდერლანდები უკრაინას F-16-ის ტიპის 18 გამანადგურებელს გადასცემდა. გუშინ, ნიდერლანდების თავდაცვის მინისტრმა, კაისა ოლონგრენმა გაავრცელა ინფორმაცია, რომ უკრაინას დამატებით ექვს F-16-ის ტიპის გამანადგურებელს გადასცემენ.