მაშველებმა ხარკოვის ოლქის ზოლოჩოვის დასახლებაში მდებარე სასტუმროს ნანგრევებიდან, რომელიც ღამით რუსებმა დაბომბეს, 2 თვის ბავშვის ცხედარი ამოასვენეს, - ინფორმაციას უკრაინული მედია ხარკოვის საოლქო-სამხედრო ადმინისტრაციის ხელმძღვანელზე, ოლეგ სინეგუბოვზე დაყრდნობით ავრცელებს.

სინეგობუვის ინფორმაციით, სამი დაშავებული მოქალაქე საავადმყოფოში გადაიყვანეს.

„მორიგი ტერორი მშვიდობიანი მოსახლეობის წინააღმდეგ. სამსართულიანი სასტუმროს ნანგრევებიდან მაშველებმა 2 თვის ბიჭის ცხედარი ამოიყვანეს. სამი ქალი, რომელთა ასაკი 21, 28 და 39 წელია, მიღებული დაზიანებებითა და ჭრილობებით საავადმყოფოში გადაიყვანეს, მათ შორისაა გარდაცვლილი ბავშვის დედაც“, - აცხადებს სინეგუბოვი.

მისი თქმით, რუსებმა დასახლებას S-300 ტიპის 2 რაკეტით დაარტყეს.

საგანგებო სიტუაციების სახელმწიფო სამსახურში აცხადებენ, რომ თავდასხმის შედეგად სასტუმროს გვერდით მდებარე ორსართულიან საცხოვრებელ სახლში ხანძარი გაჩნდა, რომელიც, მოგვიანებით, ჩააქრეს.

საერთო ჯამში, რუსების თავდასხმის შედეგად დაზიანდა 7 კერძო სახლი, 19 სამოქალაქო ინფრასტრუქტურული ობიექტი (მაღაზიები, კაფეები), 2 ადმინისტრაციული შენობა და 5 ავტომობილი.