ასეთი ინფორმაცია, რომ ეს ზონა მეწყერსაშიში ყოფილიყო არ იყო, თუმცა, რა თქმა უნდა, ჩემზე უკეთ ამაზე პროფესიონალები გაგცემენ პასუხს, - ასე გამოეხმაურა საქართველოს რეგიონული განვითარებისა და ინფრასტრუქტურის მინისტრის პირველი მოადგილე, ილია ბეგიაშვილი ბაღდათის მუნიციპალიტეტის სოფელ ნერგეეთში მომხდარ შემთხვევას.

როგორც მან ჟურნალისტებს შემთხვევის ადგილზე განუცხადა, აღნიშნულ ტერიტორიაზე ადამიანები წლებია ცხოვრობენ და მსგავსი არაფერი ახსოვთ.

„ასეთი ინფორმაცია, რომ ეს ზონა მეწყერსაშიში ყოფილიყო არ იყო, თუმცაღა, რა თქმა უნდა, ჩემზე უკეთ ამაზე პროფესიონალები გაგცემენ პასუხს, მაგრამ აქ ათწლეულები ცხოვრობდა ხალხი და ამდაგვარი არაფერი არ ახსოვთ და ამდაგვარი არაფერი მომხდარა“, - განაცხადა ილია ბეგიაშვილმა.

მისივე თქმით, სამუშაოები ადგილზე გაგრძელდება მანამდე, სანამ ყველა პირი ნაპოვნი არ იქნება.

„ვეძებთ 5 დაკარგულს, 4 გარდაცვლილია, ვიდრე სამუშაოები საჭირო იქნება და ვიდრე ნაპოვნი არ იქნება და ეს ტერიტორია უსაფრთხო არ იქნება, ტექნიკა ბოლომდე იმუშავებს“, - აღნიშნა ბეგიაშვილმა.