რუსეთის პრეზიდენტმა, ვლადიმერ პუტინმა სატელეფონო საუბრისას ილჰამ ალიევს აზერბაიჯანის საპრეზიდენტო არჩევნებში გამარჯვება მიულოცა და წარმატება უსურვა, - ინფორმაციას რუსული მედია კრემლის პრესსამსახურზე დაყრდნობით ავრცელებს.

მათივე ინფორმაციით, ვლადიმერ პუტინმა და ილჰამ ალიევმა დაადასტურეს ინტერესი სტრატეგიული პარტნიორობისა და მეკავშირეობის განვითარების მიმართ და პირადი კონტაქტების გაგრძელებაზე შეთანხმდნენ.

„დადასტურდა ორმხრივი ინტერესი რუსეთ-აზერბაიჯანის სტრატეგიული პარტნიორობისა და მეკავშირეობის შემდგომი განვითარების მიმართ. შეთანხმდნენ, რომ გაგრძელდება პირადი კონტაქტები“, - ნათქვამია კრემლის ინფორმაციაში.

შეგახსენებთ, მანამდე, აზერბაიჯანის ცენტრალური საარჩევნო კომისიის თავმჯდომარემ, მაზაჰირ პანახოვმა განაცხადა, რომ ამ დროისთვის დათვლილია საარჩევნო ბიულეტენების 93%, რომლის თანახმადაც, რესპუბლიკის ვადამდელ საპრეზიდენტო არჩევნებში ილჰამ ალიევი ხმების 92.05%-ით ლიდერობს.