დღეს, პარტია „მოქალაქეები“ საპენსიო სესხებზე „ლიბერთი ბანკის“ წინააღმდეგ სასამართლოში სარჩელს შეიტანს, - ამის შესახებ პარტია „მოქალაქეების“ დეპუტატმა, ქეთევან თურაზაშვილმა ბრიფინგზე განაცხადა.

მისივე თქმით, ეს სარჩელი არის ახალი გზა იმისთვის, რომ ყველა მოტყუებულ პენსიონერს სესხი გაუნულდეს.

„ჩვენი სარჩელი ეხება „ოვერდრაფტებს“. ეს არის საბანკო პროდუქტი, რომელიც არის ყველაზე ძვირი და რომელზეც ბანკის თანამშრომლებმა პენსიონერებს არ აუხსნეს, თუ რა საფრთხეებს შეიცავდა. არ აუხსნეს, რომ ისინი თუ ყოველთვიურად თანხას გადაიხდიდნენ, ეს წავიდოდა მხოლოდ ბანკის მომსახურების საკომისიოში და ძირს არაფერი დააკლდებოდა. მაგალითისთვის, თუ მათ 1500 ლარიანი სესხი აიღეს, 3-5 წლის შემდეგ ისევ მოუწევდათ 1500 ლარის დაბრუნება. თავად პენსიონრები „ოვერდრაფტს“ ეძახიან „ვალს სიცოცხლის ბოლომდე“ იმიტომ, რომ თვლიან, თავად ამას ვერ დააბრუნებენ“, - განაცხადა თურაზაშვილმა.