სომხეთის პრემიერ-მინისტრი, ნიკოლ ფაშინიანი აცხადებს, რომ ბაქომ შეიძლება ერევნის წინააღმდეგ ფართომასშტაბიანი ომი დაიწყოს. მთავრობის სხდომაზე საუბრისას ფაშინიანმა აღნიშნა, რომ ერევანი სთავაზობს საბჭოთა პერიოდის საზღვრების „ადგილზე“ და რუკაზე აღდგენას და მისგან ჯარების გაყვანას.

თუმცა, მისი თქმით, ბაქო არაკონსტრუქციულ პოზიციას იკავებს, პერიოდულად აყენებს საკითხს საბჭოთა პერიოდის სომხეთის ტერიტორიაზე არსებული ოთხი ანკლავის შესახებ და უარს ამბობს იმის აღიარებაზე, რომ 30-ზე მეტი სომხური სოფლის ტერიტორიები ამჟამად აზერბაიჯანის ოკუპაციის ქვეშაა.

„აზერბაიჯანი ცდილობს ჩამოაყალიბოს ისე, რომ მისმა ჯარებმა არ დატოვონ 31 სომხური სოფლის ტერიტორია. სომხეთი ადასტურებს მზადყოფნას კონკრეტული გადაწყვეტილებების მისაღებად, რომლის პრინციპები უკვე განიხილება - ეს არის საზღვრების ურთიერთ აღიარება ალმა-ათის 1991 წლის დეკლარაციის საფუძველზე. ფაქტობრივად, მხარეებს რჩებათ ტექნიკური სამუშაოები“, - განაცხადა ფაშინიანმა.

მისი თქმით, სომხეთი თანახმაა საზღვრების დელიმიტაციაზე ან ამ პროცესის ლოკალურად განხორციელებაზე, საზღვრის ნაწილებად დაყოფით.

„მაგრამ აზერბაიჯანი, როგორც ჩანს, თავს არიდებს ამ ვარიანტს. და ჩვენი ანალიზი აჩვენებს, რომ ამას შეიძლება არსებობდეს ერთი მიზეზი - დაიწყოს საბრძოლო მოქმედება საზღვრის გარკვეულ მონაკვეთებზე, სამხედრო ესკალაციის სომხეთის წინააღმდეგ ფართომასშტაბიან ომში გადაყვანის პერსპექტივით“, - აღნიშნა ფაშინიანმა.

მისი თქმით, ბაქო აგრძელებს პოლიტიკის გატარებას „მომეცი ის, რაც მინდა, თორემ სამხედრო გზით წავიღებ“.

ფაშინიანს მიაჩნია, რომ ამის თავიდან ასაცილებლად აუცილებელია აქტიურ მოლაპარაკებებში ჩართვა და ქვეყნის ინტერესების, ტერიტორიული მთლიანობისა და სუვერენიტეტის დაცვის პოზიციაზე მტკიცედ დგომა.