ბადრი ჯაფარიძე - „ქართული ოცნების“ ხელისუფლებიდან წასვლის შემდგომ ეკონომიკა ორნიშნა მაჩვენებლით გაიზრდება და აუცილებლად მივაღწევთ 1000-ლარიან პენსიას
„ქართული ოცნების” ხელისუფლებიდან წასვლის შემდგომ ეკონომიკა გაიზრდება ორნიშნა ციფრით და ჩვენ აუცილებლად მივაღწევთ 1000 ლარიან პენსიას, ჩვენი თანამოქალაქეებისთვის და პენსიონერებისთვის, - ამის შესახებ პარტია “ლელოს” ერთ-ერთმა ლიდერმა, ბადრი ჯაფარიძემ ჟურნალისტებს განუცხადა.
ჯაფარიძის თქმით, მათი მიზანია, რომ საქართველომ ევროკავშირთან არსებული შეთანხმებები სრულყოფილად გამოიყენოს.
„ჩვენ გვინდა, რომ საქართველომ ევროკავშირთან არსებული შეთანხმებები სრულყოფილად გამოიყენოს და საქართველო ევროკავშირის ბაზარზე უფრო მეტად აქტიურად მუშაობდეს და დამოკიდებული რუსეთის ფედერაციის ბაზარზე არ იყოს, რაც ჩვენ ვნახეთ, რომ ეს არის ძალიან საშიში ჩვენი ეკონომიკისთვის. ჩვენ ამაზე ვსაუბრობთ. „ქართული ოცნების” ხელისუფლებიდან წასვლის შემდგომ ეკონომიკა გაიზრდება ორნიშნა ციფრით და ჩვენ აუცილებლად მივაღწევთ 1000 ლარიან პენსიას, ჩვენი თანამოქალაქეებისთვის და პენსიონერებისთვის”, - განაცხადა ჯაფარიძემ.
გარდა ამისა, ჯაფარიძის განმარტებით, როგორც კი “ქართული ოცნება” ხელისუფლებაში აღარ იქნება, საქართველოს დამოუკიდებელი პროკურატურა ეყოლება, ასევე დამოუკიდებელი მართლმსაჯულების სისტემა ექნება.
„ეს არის პოლიტიკური გზავნილი, რომ ივანიშვილის და მისი პარტიის სტილი არის რუსული მმართველობის სტილი, რომელიც ძალიან კომფორტულად იგრძნობს თავს რუსეთის ფედერაციაში იმიტომ, რომ იქ სწორედ ასეთი ტიპის მმართველობაა. როგორც კი „ქართული ოცნება” ხელისუფლებაში აღარ იქნება, საქართველოს დამოუკიდებელი პროკურატურა ეყოლება, ასევე დამოუკიდებელი მართლმსაჯულების სისტემა და ის იმოქმედებს არა პოლიტიკური ნიშნით, რასაც დღეს ვხედავთ, როდესაც ადამიანების დევნა პოლიტიკური ნიშნით არის, იმოქმედოს მხოლოდ კანონის საფუძველზე. ამ ქვეყანაში რეპრესიები უნდა დავასრულოთ”, - აღნიშნა ჯაფარიძემ.
