დმიტრო კულება მიუნხენში ენტონი ბლინკენს შეხვდა
უკრაინის საგარეო საქმეთა მინისტრი, დმიტრო კულება მიუნხენში ენტონი ბლინკენს შეხვდა.
დმიტრო კულებას ცნობით, აშშ-ის სახელმწიფო მდივანთან მოლაპარაკებების მთავარი თემა აშშ-ის მიერ უკრაინის მხარდაჭერის გაგრძელება იყო.
„მე მას ყველაფრისთვის, რაც აშშ-მა უკრაინისთვის აქამდე გააკეთა მადლობა გადავუხადე. ასევე, უკრაინის დამცველების გადაუდებელი და პრიორიტეტული საჭიროებების: საბრძოლო მასალის, საჰაერო თავდაცვისა და შორ მანძილზე მოქმედი შესაძლებლობების შესახებ ვესაუბრე. აღნიშნულ კონტექსტში უკრაინისთვის 300 კილომეტრზე მეტ მანძილზე მოქმედი ATACMS-ის ტიპის რაკეტების მიწოდების არგუმენტები წარმოვადგინე“, - წერს კულება X-ზე.
კულებამ აღნიშნა, რომ აშშ-ის სამხედრო დახმარება ძალიან მნიშვნელოვანია.
„ჩვენ შესაბამისი გადაწყვეტილებების შესახებ აქტიურად ვმუშაობთ და მდივანმა ბლინკენმა კიდევ ერთხელ დაადასტურა, რომ აშშ მხარდაჭერის მობილიზებას გააგრძელებს“, - აღნიშნა უკრაინის საგარეო საქმეთა მინისტრმა.
v-if="article.gallery" v-html="article.gallery"
