მინერალური რესურსების ეროვნული სააგენტოს განცხადებით, მცდარია ინფორმაცია, თითქოს ოზურგეთის ტერიტორიაზე ინერტული მასალების მოსაპოვებლად აუქციონის შესახებ ბრძანება არა მინერალური რესურსების ეროვნული სააგენტოს გვერდზე, არამედ amazon.com-ზე გამოქვეყნდა.

როგორც განცხადებაშია ნათქვამი, სააგენტომ საკუთარ ვებგვერდზე გამოაქვეყნა სრული ინფორმაცია.

„გვსურს გამოვეხმაუროთ, „ერთიანი ნაციონალური მოძრაობის“ წევრის დავით მჟავანაძის მიერ, მედიასაშუალებით გავრცელებულ მცდარ ინფორმაციას, თითქოსდა ოზურგეთის ტერიტორიაზე ინერტული მასალების მოსაპოვებლად აუქციონის შესახებ ბრძანება არა მინერალური რესურსების ეროვნული სააგენტოს გვერდზე, არამედ amazon.com-ზე გამოქვეყნდა.

ხაზგასმით ვაცხადებთ, რომ აღნიშნული პოლიტიკური პარტიის წევრის მხრიდან ადგილი ჰქონდა მიზანმიმართულად დეზინფორმაციის გავრცელებასა და საზოგადოების შეცდომაში შეყვანას.

სსიპ მინერალური რესურსების ეროვნულმა სააგენტომ, კანონით დადგენილი მოთხოვნათა სრული დაცვით, (ლიცენზიებისა და ნებართვების შესახებ საქართველოს კანონის მე-18 მუხლის მე-9 პუნქტი) აუქციონის გამართვის თარიღამდე, არაუგვიანეს 3 სამუშაო დღით ადრე, საკუთარ ვებგვერდზე (https://namr.gov.ge/auction) გამოაქვეყნა სრული ინფორმაცია. რომელიც მოიცავდა - ლიცენზიის მაძიებლის მიერ განცხადების მიღებისა და აუქციონის გამართვის ვადების, კანონმდებლობით დადგენილ სალიცენზიო პირობების, კონკრეტული ობიექტის სარგებლობისათვის დადგენილი მოთხოვნებისა და იმ ვებგვერდის მისამართის შესახებ (www.eauction.ge), რომლის საშუალებითაც გაიმართება სასარგებლო წიაღისეულის მოპოვების ლიცენზიის გაცემის მიზნით აუქციონი“,- აღნიშნულია განცხადებაში.