ადამიანის უფლებათა დაცვისა და სამოქალაქო ინტეგრაციის კომიტეტმა „საავტომობილო ტრანსპორტის შესახებ" კანონში შესატან ცვლილებაზე იმსჯელა. ამის შესახებ ინფორმაციას პარლამენტი ავრცელებს.

ეკონომიკისა და მდგრადი განვითარების მინისტრის მოადგილის, გურამ გურამიშვილის განცხადებით, სანებართვო საქმიანობების ჩამონათვალს ახალი სანებართვო საქმიანობა - მუნიციპალიტეტის ადმინისტრაციულ საზღვრებში მსუბუქი ავტომობილით − ტაქსით (M1 კატეგორია) გადაყვანა ემატება.

ცვლილება, დედაქალაქის გარდა, ყველა მუნიციპალიტეტს ეხება.

„აღნიშნულ საქმიანობაზე ნებართვა გაიცემა არანაკლებ 1 წლის ვადით, ნებართვის მოქმედების ვადებს კი განსაზღვრავს მუნიციპალიტეტის წარმომადგენლობითი ორგანო", - განაცხადა გურამ გურამიშვილმა.

მისი თქმით, აღნიშნულ საქმიანობაზე ნებართვის გაცემის უფლებამოსილება მუნიციპალიტეტის მერს ან მის მიერ უფლებამოსილ მუნიციპალიტეტის მერიის სტრუქტურულ ერთეულს ენიჭება.

„მუნიციპალიტეტის ადმინისტრაციულ საზღვრებში მსუბუქი ავტომობილით − ტაქსით გადაყვანის ნებართვის გაცემა რეგულირდება „ლიცენზიებისა და ნებართვების შესახებ" კანონით.

კანონპროექტით, მუნიციპალიტეტებს 2025 წლის 1 ივნისამდე ეძლევათ ვადა, მსუბუქი ავტომობილით − ტაქსით გადაყვანის ნებართვის მფლობელთა შესახებ მონაცემები ერთიან საინფორმაციო ბაზაში ასახონ, რომლის შექმნის, განახლებისა და დამუშავების წესს საქართველოს მთავრობა 2025 წლის 1 იანვრამდე განსაზღვრავს.

ამასთან, შესაძლებელი იქნება მინივენით არარეგულარული სამგზავრო გადაყვანა საქართველოს მთავრობის ნორმატიული აქტით დადგენილი წესის შესაბამისად, რომელიც საქართველოს მთავრობამ 2025 წლის 1 იანვრამდე უნდა მიიღოს.

კომიტეტმა კანონპროექტს მხარი დაუჭირა“ , - ნათქვამია პარლამენტის მიერ გავრცელებულ ინფორმაციაში.