მე მგონი, არ არსებობს იმაზე დიდი ანტიევროპული რიტორიკა, რომელშიც ზოგიერთი ევროპარლამენტარი არის ჩართული, ვიდრე სადისტი ადამიანის ასეთი მხარდაჭერაა - ეს არის დისკრედიტაცია საერთოდ ევროპული ღირებულებების, - ამის შესახებ პარლამენტის ვიცე-სპიკერმა, გია ვოლსკიმ ევროპელი პარტნიორების მხრიდან საქართველოს მესამე პრეზიდენტთან დაკავშირებით გაკეთებულ შეფასებებზე საუბრისას განაცხადა.

მისივე თქმით, მიხეილ სააკაშვილის „დაცვასთან“ დაკავშირებით ზოგიერთი ევროპარლამენტარისგან გაკეთებული განცხადებები "აბსოლუტურად ანტიევროპული მესიჯებია“.

როგორც ვოლსკი აღნიშნავს, რომ არა „ქართული ოცნება“, ევროინტეგრაციას საერთოდ არ ექნებოდა იმ დოზის მხარდაჭერა, რაც დღეს აქვს.

„მე მგონი, არ არსებობს იმაზე მეტი, იმაზე დიდი ანტიევროპული რიტორიკა, რომელშიც ზოგიერთი ევროპარლამენტარი არის ჩართული, ვიდრე სადისტი ადამიანის ასეთი მხარდაჭერაა. რა მესიჯს უგზავნი ქართულ საზოგადოებას? რომ ადამიანი, რომელმაც აწამა, მოკლა და რომლის სისტემური მმართველობა იყო სადისტური, ის არის თურმე დემოკრატიის მშენებელი და დემოკრატიის შუქურა?" - აღნიშნა ვოლსკიმ.

მისივე თქმით, ნებისმიერი ევროპარლამენტარი, ვინც ხელს მოაწერს მიხეილ სააკაშვილის შეწყალებაზე პეტიციას ნიშნავს, რომ პრინციპულად უპირისპირდება ევროპულ სტანდარტს, რომელიც გულისხმობს ადამიანების უფლებების დაცვას.

„ეს არის ანტიევროპული პროპაგანდა. შეწყალება ადამიანისა, რომელმაც ფეხქვეშ გათელა ადამიანების უფლებები, წამებაში ამოხადა სული არა ერთს და პირდაპირ ჩვენს თვალწინ ქუჩაში დახვრიტა არა ერთი ადამიანი, რა თქმა უნდა, ეს პირდაპირ მიუთითებს სწორედ იმ ანტიდასავლურ პროპაგანდაზე, რაზედაც თურმე ბორელს ჰქონდა ლაპარაკი“, - განაცხადა ვოლსკიმ.