„ქართული ოცნების“ დეპუტატმა მერაბ ქვარაიამ პარლამენტის პლენარულ სხდომაზე, სადაც ფინანსთა მინისტრს ლაშა ხუციშვილს უსმენენ, ფინანსური ამნისტიის გამოცხადების საკითხი დასვა.

როგორც ქვარაიამ განაცხადა, ფიზიკურ პირებს კვლავაც „ზურგზე აწევთ“ წინა ხელისუფლების დროს დაკისრებული ფინანსური სანქციები.

„იმ პრეზიდენტის დროს, რომელსაც ახლა პატიმრობა არ მოსწონს და თვითონ მთელი საქართველო პატიმრად აქცია, არა მხოლოდ ციხეებში გამოკეტეს მთელი ქვეყანა, არამედ ფიზიკურ პირებს ძალიან დიდი სანქცია-საურავები დააკისრეს - აღარ ვსაუბრობ იურიდიულ პირებზე. ისე ხდება, რომ დღემდე ამ ადამიანების ვალდებულებები მათ ზურგზეა. იქნებ ვიფიქროთ ამაზე - არასწორი სანქცია-საურავების გასწორება-განულებაზე, რათა ამ ხალხმა ფინანსური საქმიანობა თავიდან, სუფთა ფურცლიდან დაიწყოს. ფიზიკურ პირებზე ფინანსური ამნისტია ცუდი არ იქნება და ამაზე ფიქრი ღირს“, - განაცხადა მერაბ ქვარაიამ პარლამენტის პლენარულ სხდომაზე ფინანსთა მინისტრი პარლამენტში “მინისტრის საათის“ ფორმატში იმყოფება.

ლაშა ხუციშვილი უწყების მიერ გაწეული მუშაობის ანგარიში წარადგინა და ახლა დეპუტატების კითხვებს პასუხობს.