არასწორი და აბსურდულია იმაზე საუბარი, რომ დედოლარიზაციამ ფული გააძვირა - პირდაპირ გეტყვით, უცხოურ ვალუტაში გაცემული სესხების მარჟა გაცილებით მეტია, ვიდრე ლარში, - ამის შესახებ ეროვნული ბანკის პრეზიდენტის მოვალეობის შემსრულებელმა ნათია თურნავამ პარლამენტის პლენარულ სხდომაზე განაცხადა.
თურნავას თქმით, ხდება მონეტარული პოლიტიკის შერბილება, ლარში საპროცენტო განაკვეთები კლებულობს, მაშინ როცა დოლარსა და ევროში საპროცენტო განაკვეთები ჯერ კიდევ მაღალია.
„გამომდინარე აქედან, მეტი ლარი ეს არის უფრო მომგებიანი და ეს არის მოსახლეობის დაზღვევა. ჩვენ არ ვამბობთ, რომ უნდა იყოს დედოლარიზაცია და ლარიზაცია - ჩვენ ვამბობთ, რომ უნდა იყოს ჰეჯირება, რაც სავალუტო რისკებისგან დაცვას ნიშნავს. ვისაც რა ვალუტაში აქვს შემოსავალი, სესხის აღება იმ ვალუტაში უნდა შეძლოს. ეს არის ჩვენი მომხმარებლების ფინანსური სირთულეებისგან დაცვა“, - განაცხადა ნათია თურნავამ.
თურნავა პარლამენტში, ინტერპელაციის წესით, საპენსიო სესხების თემაზე იმყოფებოდა.
