უკრაინელმა სამხედროებმა დონეცკის ოლქის სოფელ ლასტოჩკინოდან უკან დაიხიეს, - ამის შესახებ ოპერატიულ-სტრატეგიული ჯარების ჯგუფის, „ტავრიას“ სპიკერმა, დიმიტრი ლიხოვმა განაცხადა.

„მოწინააღმდეგის ზეწოლის მიუხედავად, ჩვენი ქვედანაყოფები ახორციელებენ აქტიურ თავდაცვას, მოქმედებენ მანევრირებულად. ავდიივკა- მარინკას მიმართულება ყველაზე ცხელ მიმართულებად რჩება. ჩვენმა ჯარებმა ავდიივკას მიმართულებით მტრის 25 შეტევა მოიგერიეს, მარინკაში - 40. ეს არის ყველაზე მაღალი მაჩვენებელი ბოლო რამდენიმე დღის პერიოდში“, - აღნიშნა დიმიტრი ლიხოვმა.

მისი თქმით, უკრაინელების ლასტოჩკინოდან გასვლა ორლოვკა-ბერდიჩის დასახლებების ხაზის გასწვრივ თავდაცვის ორგანიზებისა და მტრის შემდგომი წინსვლის აღკვეთის მიზნით მოხდა.

„უკრაინის თავდაცვის ძალებმა უკან დაიხიეს სოფელ ლასტოჩკინოდან, რათა მოეხდინათ თავდაცვის ორგანიზება ორლოვკა-ბერდიჩის დასახლებების ხაზის გასწვრივ და თავიდან აეცილებინათ მტრის შემდგომი წინსვლა“, - განაცხადა ლიხოვმა.

ცნობისათვის, ლასტოჩკინო ავდიივკადან 6 კილომეტრში მდებარეობს.