ბახმაროს გადარჩენის საინიციატივო ჯგუფის წევრმა, პარლამენტის დეპუტატმა, არმაზ ახვლედიანმა, ეკონომიკისა და გარემოს დაცვის მინისტრებს, ბახმაროში, კომპანია „ორბის“ პროექტის შეჩერება სთხოვა.

შესაბამისი მოთხოვნის წერილით სამინისტროებს მან დღეს მიმართა და ასევე, მოითხოვა „ორბის“ წარმომადგენლებთან შეხვედრის ორგანიზება.

როგორც არმაზ ახვლედიანმა „ინტერპრესნიუსს“ განუცხადა, ერთ ლარად გადაცემულ რამდენიმე მილიონიან მიწის ნაკვეთზე „ორბის“ მიერ „ამ ბარბაროსული პროექტის დაწყება ბახმაროს განაჩენს გამოუტანს“.

„დღეს მე ბახმაროს გადარჩენის საინიციატივო ჯგუფის სახელით, ეკონომიკის, სოფლის მეურნეობისა და გარემოს დაცვის სამინისტროებში, მინისტრების სახელზე, წერილი შევიტანე. ამ წერილით ჩვენ, საინიციატივო ჯგუფის წევრები, მინისტრებს მივმართავთ და ჩვენი ჯგუფის წარმომადგენლებისა და კომპანია „ორბის“ წარმომადგენლების შეხვედრის ორგანიზებას ვთხოვთ. ამ შეხვედრაზე გაიმართებოდა მსჯელობა დღეს მინისტრების სახელზე გაგზავნილ წერილში ჩამოყალიბებულ მთავარ კითხვებსა და ბახმაროს თემით დაინტერესებული ექსპერტების არგუმენტებზე. ჩვენ ვითხოვთ კომპანია „ორბის“ პროექტის შეჩერებას, იმიტომ, რომ კომპანია „ორბის“ პროექტის დაწყების შემთხვევაში ბახმაროს შეექმნება იმ ტიპის საფრთხეები, რომელთა გამოსწორებაც მერე ვეღარ მოხერხდება. უპირველეს ყოვლისა, ეს საფრთხე დაკავშირებულია ბახმაროს უნიკალური ეკოსისტემის, ლანდშაფტის, ბუნებრივი პირობების სრულ დარღვევასთან. ეს კი უკავშირდება ბახმაროში დღეს არსებული კოტეჯების, იქ მცხოვრები ადამიანების ცხოვრების ნორმალური პირობების შენარჩუნებას. მომავალში „ორბის“ მშენებლობა ავტომატურად გამოიწვევს მსგავსი კომპანიების მიერ ბახმაროს სხვა ნაწილების ჩაბეტონებას, რაც შეუქცევადად შეცვლის ბახმაროს იერსახეს. შედეგად, ბახმაროში მივიღებთ ახალ ბაკურიანს, გუდაურს, ჩაბეტონებულს. ფაქტობრივად, ეს იქნება დანაშაული არამხოლოდ ბახმაროს მიმართ, არამედ დანაშაული მთელი ჩვენი ქვეყნის მიმართ. იმიტომ, რომ ასეთი ტიპის უნიკალური კურორტი, საუბედუროდ, თითზე ჩამოსათვლელიც აღარ დაგვრჩა.

უნდა გვახსოვდეს, რომ ეს უნიკალური, თითქმის, 4 ჰა ოქროს მთის ნაკვეთი ბახმაროში, საქართველოს მთავრობამ, „ორბს“ ერთ ლარად გადასცა, გაუგებარია რატომ, რა მიზნით. ბევრი ეჭვი არსებობს აქ და ამ ერთ ლარად გადაცემულ რამდენიმე მილიონიან მიწის ნაკვეთზე „ორბის“ მიერ ამ ბარბაროსული პროექტის დაწყებით განაჩენი შეიძლება გამოვუტანოთ ბახმაროს. ჩვენ, საინიციატივო ჯგუფის წევრები და ათასობით მხარდამჭერი, ბახმაროს გულშემატკივარი, ამას არ დაუშვებთ“, - განაცხადა არმაზ ახვლედიანმა.