უკრაინისა და საკუთარი უსაფრთხოების მხარდასაჭერად ევროპა აშშ-ის არჩევნებს არ უნდა დაელოდოს, - ამის შესახებ საფრანგეთის პრეზიდენტმა, ემანუელ მაკრონმა განაცხადა.

„ჩვენ ამერიკის არჩევნების შედეგებს ვერ დაველოდებით, რათა გადავწყვიტოთ, როგორი იქნება ჩვენი მომავალი. ევროპის მომავალი სასწორზე დგას, ამიტომ გადაწყვეტილება ევროპელებმა უნდა მიიღონ. თუ სხვებს დახმარება სურთ, ეს ფანტასტიკურია, მაგრამ ეს მხოლოდ დამატებითი ბონუსია“, - განაცხადა ემანუელ მაკრონმა.

საფრანგეთის პრეზიდენტმა პარიზში გამართულ ევროპელი ლიდერების სამიტზე აღნიშნა, რომ ევროპის უსაფრთხოებისთვის რუსეთის დამარცხება აუცილებელია.

„იგი ერთადერთი ქვეყანაა, რომელმაც ეს ომი გამოიწვია. რუსეთი ჩვენს უსაფრთხოებაზე, როგორც ტრადიციული, ისე ჰიბრიდული ომით ახდენს გავლენას“, - აღნიშნა საფრანგეთის პრეზიდენტმა.

ემანუელ მაკრონმა, ასევე, ხაზი გაუსვა იმას, რომ ბოლო კვირების განმავლობაში მოსკოვის ქმედებები იმაზე მიუთითებს, რომ მომდევნო რამდენიმე წელიწადში რუსეთმა შეიძლება ნატო-ს ქვეყნებს შეუტიოს.