„საქსტატის“ მონაცემებით, 2023 წლის მეოთხე კვარტალში საქართველოს ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა 1 245.8 ათასით განისაზღვრა, რომელთა მიერ ქვეყნის ტერიტორიაზე განხორციელებული ვიზიტების საშუალო თვიურმა რაოდენობამ 1 573.9 ათასი ერთეული შეადგინა.

მათივე ინფორმაციით, აღნიშნულ პერიოდში ვიზიტორების რაოდენობა გაიზარდა 7.5 პროცენტით, ხოლო მათ მიერ განხორციელებული ვიზიტების რაოდენობა 19.9 პროცენტით აღემატება წინა წლის ანალოგიური პერიოდის მაჩვენებელს.

„2023 წლის მეოთხე კვარტალში საქართველოს რეზიდენტი ვიზიტორების მიერ საქართველოს ტერიტორიაზე განხორციელებული ტურისტული ტიპის ვიზიტების საშუალო თვიური რაოდენობა 658.8 ათასით განისაზღვრა, რაც 10.6 პროცენტით მეტია წინა წლის ანალოგიური პერიოდის მაჩვენებელზე.

2023 წლის მეოთხე კვარტალში ვიზიტორების 37.7 პროცენტი მიეკუთვნებოდა 31-50 წლამდე ასაკობრივ კატეგორიას. ამასთან, ქალების რაოდენობა ვიზიტორების ჯამური რაოდენობის 53.8 პროცენტს შეადგენდა.

გამოკვლევის შედეგების მიხედვით, ვიზიტორების 32.8 პროცენტი თბილისის მაცხოვრებელია, 18.3 პროცენტი მოდის იმერეთის, რაჭა-ლეჩხუმისა და ქვემო სვანეთის რეგიონზე, 8.8 პროცენტი - ქვემო ქართლის რეგიონზე, ხოლო დანარჩენი რეგიონები სტრუქტურაში შედარებით დაბალი წილით არის წარმოდგენილი.

2023 წლის მეოთხე კვარტალში ვიზიტების უმრავლესობა (50.6 პროცენტი) განხორციელდა მეგობრების/ნათესავების მონახულების მიზნით.

საანგარიშო პერიოდში ვიზიტების ყველაზე დიდი ნაწილი განხორციელდა ქ. თბილისში (საშუალოდ 380.4 ათასი ვიზიტი თვეში) და იმერეთის რეგიონში (საშუალოდ 365.9 ათასი ვიზიტი თვეში).

2023 წლის მეოთხე კვარტალში განხორციელებული ვიზიტებისას გაწეული საშუალო თვიური ხარჯების მოცულობა განისაზღვრა 267.6 მილიონი ლარით. აღნიშნული მაჩვენებელი 17.3 პროცენტით მეტია გასული წლის ანალოგიური პერიოდის მაჩვენებელზე. ამასთან, ვიზიტზე გაწეული საშუალო ხარჯი შემცირდა 2.2 პროცენტით და 170.0 ლარს გაუტოლდა“,- ნათქვამია ინფორმაციაში.