ამ ტიპის განცხადებები, როდესაც თეთრზე შავს გეუბნებიან, დამაზიანებელია და საგარეო ურთიერთობებს აზიანებს, - ასე შეაფასა თბილისის მერმა, კახა კალაძის ევროპარლამენტის მიერ ანგარიშის მიღება, რომელშიც ექსპრეზიდენტ მიხეილ სააკაშვილის გათავისუფლების მოთხოვნაა გაჟღერებული.

როგორც კალაძემ ჟურნალისტებს განუცხადა, ევროკავშირის აღმასრულებელი რგოლი ამ განცხადებებს უნდა გაემიჯნოს.

„ქვეყანაში ევროინტეგრაციის პროცესს და ქვეყნის ევროპულ მომავალს 80%-ზე მეტი ადამიანი ემხრობა, ეს რა თქმა უნდა, ძალიან მნიშვნელოვანია. საზოგადოებას ევროპა წარმოუდგენია, სადაც არის სამართლიანობა, ადამიანის უფლებები, სიტყვისა და გამოხატვის თავისუფლება, საკუთრების უფლება დაცული და ასე შემდეგ. ამ ტიპის განცხადებები, როდესაც თეთრზე შავს გეუბნებიან, დამაზიანებელია, საზოგადოებაში იწვევს ნიჰილიზმს და არასწორ დამოკიდებულებას ევროპული მომავლის მიმართ. შესაბამისად, ძალიან ცუდია ზოგიერთი ოდიოზური ევროპარლამენტარის მხრიდან ამ ტიპის განცხადებების გაკეთება. ევროკავშირის აღმასრულებელი რგოლი ამ განცხადებებს უნდა გაემიჯნოს. დღეს ძალიან ბევრი ითქვა ამასთან დაკავშირებით, პირად საუბრებში აბსოლუტურად სხვა დამოკიდებულება არის ამ საკითხებთან დაკავშირებით. შესაბამისად, ძალიან მნიშვნელოვანი იქნება ამ ყველაფრის გამიჯვნა იმიტომ, რომ ამ ტიპის განცხადებები, როდესაც თეთრზე შავს გეუბნებიან, დამაზიანებელია და საგარეო ურთიერთობებს აზიანებს“, - განაცხადა კალაძემ.

ცნობისთვის, ევროპარლამენტარი ანა ფოტიგა აცხადებს, რომ ევროპარლამენტის რეზოლუციაში მისი მოთხოვნით ორი შესწორება შევიდა. ევროპარლამენტარი სოციალურ ქსელ X-ში წერს, რომ ცვლილებები ეხება საქართველოს ყოფილი პრეზიდენტის, მიხეილ სააკაშვილის გათავისუფლებას და საქართველოს ოკუპირებულ ტერიტორიებს.