ახლად გაფართოებული ნატო ფართომასშტაბიან სამხედრო წვრთნებს იწყებს, რომელიც თითქმის ორ კვირას გაგრძელდება.

მედიის ინფორმაციით, Nordic Response 24-ში, რომელიც ფინეთის, ნორვეგიისა და შვედეთის ჩრდილოეთ რეგიონებში ჩატარდება, მონაწილეობას 13 ქვეყნის 20 000-ზე მეტი ჯარისკაცი მიიღებს, მათ შორის ნატო-ს ახალი წევრი ქვეყნის, ფინეთის 4 000-ზე მეტი ჯარისკაცი.

წვრთნების სხვა მონაწილე ქვეყნები არიან: ბელგია, გაერთიანებული სამეფო, კანადა, დანია, საფრანგეთი, გერმანია, იტალია, ნიდერლანდები, ნორვეგია, ესპანეთი, შვედეთი და აშშ.

მონაწილე ჯარების დაახლოებით ნახევარი წვრთნებს ხმელეთზე გაივლის, დანარჩენი კი - ზღვაზე. კერძოდ, ჩართული იქნება 50-ზე მეტი წყალქვეშა ნავი, ფრეგატი, კორვეტი, ავიამზიდი და სხვადასხვა სადესანტო ხომალდი, ხოლო ჰაერში - 100-ზე მეტი გამანადგურებელი, სატრანსპორტო თვითმფრინავი, საზღვაო სადაზვერვო დრონი და ვერტმფრენი. ერთობლივი წვრთნები სკანდინავიის რეგიონის დაცვასა და თავდაცვაზე იქნება ორიენტირებული.