გურიაში, რომელსაც უდიდესი ტურისტული პოტენციალი აქვს, ყოველი მეორე ადამიანი უკიდურეს სიღარიბეში ცხოვრობს. მხოლოდ ოზურგეთში 8407 სკოლის მოსწავლიდან ყოველი მეორის ოჯახი ითხოვს სოციალურ დახმარებას. ივანიშვილის ხელისუფლებამ ხალხს მოუტანა სიღარიბე და ეს ყველაფერი 2024 წელს ერთად უნდა დავამარცხოთ, - ამის შესახებ „ერთიანი ნაციონალური მოძრაობის“ პოლიტსაბჭოს თავმჯდომარის მოადგილემ, თათია ნიკოლაშვილმა განაცხადა.

როგორც ნიკოლაშვილი აღნიშნავს, ერთადერთი გამოსავალი 2024 წლის არჩევნებით ხელისუფლების შეცვლაა.

„გურიაში, რომელსაც აქვს უდიდესი პოტენციალი ეკონომიკურად და ტურისტულად, ყოველი მეორე ადამიანი უკიდურეს სიღარიბეში ცხოვრობს. მხოლოდ ოზურგეთში 8407 სკოლის მოსწავლიდან ყოველი მეორის ოჯახი ითხოვს სოციალურ დახმარებას, რადგან ელემენტარულად ვერ კვებავენ საკუთარ შვილებს. მაშინ, როდესაც ჩვენ ოზურგეთის მერს მივმართეთ, ივანიშვილის პირად მოურავს, რომ ამ ბავშვებს ჰქონოდათ უფასო კვება სკოლებში, პასუხის ღირსადაც კი არ ჩათვალა მან, რადგან ივანიშვილის ხელისუფლებას არ აინტერესებს საქართველოს მოქალაქეები. დიასახლისებს ეშინიათ პროდუქტის საყიდლად მაღაზიაში შესვლა, რადგან იმ დღეს შეიძლება უფრო გაძვირებული ფასები დახვდეს და ოჯახში პროდუქტი ვერ მიიტანონ. თუ დააკვირდებით ადამიანებს, დამძიმებულები, ჩაფიქრებულები დადიან, რომ ეშინიათ ყოველდღიურად საკვების სახლში ვერ მიტანის, ამიტომ ერთადერთი გამოსავალი არის, რომ 2024 წელი, რომელიც არის უდიდესი შესაძლებლობა ერთად დავამარცხოთ გაჭირვება და ამ შესაძლებლობას აუცილებლად გამოიყენებს ქართველი ხალხი. ეს შესაძლებლობა გურულებისთვის იქნება მეტი ეკონომიკური დოვლათის მომტანი. ჩვენ გვინდა გვქონდეს ძლიერი, ბედნიერი ქართული ოჯახები”, - განაცხადა თათია ნიკოლაშვილმა