ტრუსკავეცი, რომელსაც ხშირად მახსენებენ ხოლმე, ჩვენ არ დაგვსიზმრებია, ეს ჩვენი უკრაინელი კოლეგებისგან (არ დავაკონკრეტებ, ამის დროც მოვა) მოწოდებული ინფორმაცია იყო - გვამშვიდებდნენ, ეს კაცი არაფერს აპირებს, აქ არის და ტრუსკავეცში რამდენიმე დღეა ნომრიდან არ გამოსულაო, მეორე დღეს ბოდიშები ვიხადე,- ამის შესახებ საპარლამენტო უმრავლესობის ლიდერმა მამუკა მდინარაძემ ჟურნალისტებს განუცხადა, რითაც გაიხსენა მიხეილ სააკაშვილის საქართველოში შემოსვლის დროს საკუთარი განცხადება, რომ სააკაშვილი არა ბათუმში არამედ უკრაინის კურორტ ტრუსკავეცში იყო.
მდინარაძის თქმით, უკრაინასთან საქართველოს ცალმხრივი მეგობრობა აქვს.
“ეს ცალმხრივი მეგობრობა ცოტა უცნაურია. დღეს მომეცა საშუალება, ვთქვა, რომ მაგალითად, ტრუსკავეციც, რომელსაც ხშირად მახსენებენ ხოლმე, ჩვენ არ დაგვსიზმრებია. ეს ჩვენი უკრაინელი კოლეგებისგან (არ დავაკონკრეტებ, ამის დროც მოვა) მოწოდებული ინფორმაცია იყო. გვამშვიდებდნენ, ეს კაცი არაფერს აპირებს, აქ არის და ტრუსკავეცში რამდენიმე დღეა ნომრიდან არ გამოსულაო. მეორე დღეს ბოდიშები ვიხადე.
იქ არის ლორთქიფანიძე და სხვა ადამიანები, რომლებიც არათუ ასეთ ინფორმაციას გვაწვდიან, არამედ წინაურდებიან სააკაშვილის ამ ინციდენტის შემდეგ. განუბაჟებლად შემოაპარეს საქართველოში და ამის შემდეგ დაწინაურდნენ. შესაბამისად, მიიღონ ჩვენი გულწრფელი საყვედური ამასთან დაკავშირებით, გადმოგვცენ სისხლის სამართლის დამნაშავეები. თუ რაიმე პლატფორმა არსებობს, ისედაც მხარს ვუჭერთ მათ, უდიდეს პოლიტიკურ რისკზეც წავედით, რომ ჰააგასთან მიმართებით შევუერთდით რუსეთის წინააღმდეგ სანქციების მოთხოვნას. ამ ფონზე, როდესაც 600-ზე მეტ დოკუმენტს ვართ შეერთებული, მათგან რას ვხედავთ - იმ ნარატივებში ჩაბმას, რასაც საქართველოს წინააღმდეგ ახორციელებენ სხვადასხვა ადამიანები ქვეყნის შიგნიდან თუ გარედან. ცალმხრივი მეგობრობა გაგრძელდება, სამწუხაროა, რომ ამის თქმა გვიწევს, მაგრამ ამასობაში ჩვენ რაღაც ეტაპზე სიმართლე უნდა ვთქვათ”, - განაცხადა მამუკა მდინარაძემ.
