შვეიცარიის კონფედერაციაში ძალიან მნიშვნელოვანი ვიზიტია. ბოლო წლების განმავლობაში ქვეყნებს შორის ურთიერთობები მკვეთრად გაუმჯობესდა როგორც საპარლამენტო, ისე მთავრობის დონეზე, - ამის შესახებ ჯანმრთელობის დაცვისა და სოციალურ საკითხთა კომიტეტის თავმჯდომარემ, ზაზა ლომინაძემ შვეიცარიაში განაცხადა.

როგორც მან აღნიშნა, ორ ქვეყანას შორის პროექტების მხარდაჭერა უნდა მოხდეს, რაც მეტ მეტ შესაძლებლობებს ითვალისწინებს.

,,ეს ვიზიტი სწორედ ემსახურება იმას, რომ მეტი დაახლოება და დამეგობრება მოხდეს. იცით, რომ მკვეთრად გაუმჯობესდა მდგომარეობა ტურიზმის მიმართულებით. ბოლო პერიოდში ქვეყნებს შორის სავაჭრო ბრუნვა დაახლოებით, 28-30 პროცენტით გაიზარდა. აღსანიშნავია, რომ საქართველოში 40-მდე შვეიცარიული კომპანია ოპერირებს და ბოლო პერიოდში მათი ინვესტიცია 12-13 პროცენტით არის გაზრდილი. შვეიცარიის ორივე პალატაში გვექნება შეხვედრები და ვისაუბრებთ იმაზე, როგორ შეიძლება, ჩვენი ურთიერთობები კიდევ უფრო მეტად გაუმჯობესდეს. შარშან, საქართველოს პარლამენტმა ახალი კანონი მიიღო, რომელიც მთავრობას შესაძლებლობას აძლევდა, პირდაპირი შესყიდვით ქვეყანაში შემოეტანა ინოვაციური, ონკოლოგიური მედიკამენტები. ეს მედიკამენტები უკვე ხმარდება ონკოპაციენტებს. ამის გაფართოებაც იგეგმება. ამიტომ, პროექტების მხარდაჭერა უნდა მოხდეს, რაც ითვალისწინებს მეტ სავაჭრო ბრუნვასა და ქვეყანაში მეტი ტურისტის ჩამოსვლას. სწორედ ზუსტად ამ მიზნით გაიმართება შეხვედრები“, – განაცხადა ზაზა ლომინაძემ.