POLITICO - სი ძინპინი პარიზში ემანუელ მაკრონს შეხვდება
ჩინეთის პრეზიდენტი სი ძინპინი მაისის დასაწყისში პარიზს ეწვევა და ფრანგ კოლეგას, ემანუელ მაკრონს შეხვდება, - ინფორმაციას POLITICO ოფიციალურ პირებზე დაყრდნობით ავრცელებს, რომლებიც გამოცემას ანონიმურობის დაცვის პირობით ესაუბრნენ.
POLITICO წერს, რომ ჩინეთის ლიდერის ვიზიტი ემთხვევა პარიზისა და პეკინის დიპლომატიური ურთიერთობების 60 წლის იუბილეს იმ ფონზე, როდესაც ჩინეთს სურს აღადგინოს გაუარესებული ურთიერთობები ევროპასთან რუსეთის პრეზიდენტ ვლადიმერ პუტინთან მისი "უსაზღვრო პარტნიორობის" გამო.
„მაგრამ განწყობა საფრანგეთში, სავარაუდოდ, განსხვავებული იქნება იმ დღესასწაულებთან შედარებით, რომლებიც აღინიშნა ორ ქვეყანას შორის ორმხრივი ურთიერთობების 50 წლისთავთან დაკავშირებით. ეს იქნება ნაკლებად სადღესასწაულო და უფრო სტუდიური, არსებული ეკონომიკური და გეოპოლიტიკური ფსონების გათვალისწინებით,”- განაცხადა ინფორმირებულმა წყარომ POLITICO-სთან საუბარში.
გამოცემა წერს, რომ სი ძინპინის ვიზიტს ყურადღებით დააკვირდებიან ვაშინგტონსა და ევროპის დედაქალაქებში.
ამასთან, ოფიციალურმა პირებმა POLITICO-ს ცოტა ხნის წინ განუცხადეს, რომ ჩინეთი ცდილობს დაარწმუნოს ევროპა, დაუშვას რუსეთის სამშვიდობო მოლაპარაკებების მაგიდასთან დაჯდომა, პოტენციურად შვეიცარიაში - წინააღმდეგ შემთხვევაში პეკინი ბოიკოტს გამოუცხადებს ასეთ შეხვედრებს.
POLITICO-ს ინფორმაციით, აპრილში ჩინეთში გერმანიის კანცლერ ოლაფ შოლცის ვიზიტი იგეგმება.
v-if="article.gallery" v-html="article.gallery"
