სომხეთის პრემიერ-მინისტრ ნიკოლ ფაშინიანის განცხადება აზერბაიჯანთან ომის საფრთხის არსებობის შესახებ, არ არის დაკავშირებული რუსეთთან, ეს არის ერევნის ხელისუფლების კომპეტენცია და დასავლეთთან მათი კონსულტაციების შედეგი, - ამის შესახებ რუსეთის საგარეო საქმეთა სამინისტროს პრესსპიკერმა, მარია ზახაროვამ განაცხადა.

„სადამდე მიიყვანეს საქმე ახალმა კურატორებმა ევროკავშირიდან, ნატო-დან და ვაშინგტონიდან? გთხოვთ გაითვალისწინოთ: ეს განცხადება არანაირად არ არის დაკავშირებული რუსეთთან. ეს არის ერევნის დღევანდელი ხელისუფლების ექსკლუზიური კომპეტენცია და დასავლეთთან მათი კონსულტაციების შედეგი“, - წერს ზახაროვა „ტელეგრამ“ არხზე.

შეგახსენებთ, მანამდე, სომხეთის პრემიერ-მინისტრმა ნიკოლ ფაშინიანმა განაცხადა, რომ თუ ერევანი არ შეასრულებს ბაქოს მოთხოვნებს აზერბაიჯანისთვის რამდენიმე სოფლის გადაცემის შესახებ, შესაძლოა, ომი დაიწყოს.