როგორ ხდება, რომ საქართველოში ბევრად უფრო ძვირია სურსათზე ფასები, ვიდრე ჩვენს მეზობელ სომხეთში, რომელსაც საქართველოს გავლით მიეწოდება ეს პროდუქტები. იმავეს ვსაუბრობთ საწვავთან დაკავშირებით - თუ ტერმინალში მოტანილი საწვავი ღირს 1.65 ლარი, როგორ ხდება, რომ ბენზინგასამართ სადგურებში საწვავი უკვე 3 ლარზე მეტი ღირს. ერთი დეპუტატიც არ გამოჩნდა „ქართული ოცნებიდან“, რომელიც ამ სამართლიან კითხვებს გასცემდა პასუხს, - ამის შესახებ პარტია „სტრატეგია აღმაშენებლის“ დეპუტატმა პაატა მანჯგალაძემ პლენარულ სხდომაზე სიტყვით გამოსვლისას განაცხადა.

მისი თქმით, ხვნა-თესვის სამუშაოები ახლოვდება და ხალხს ძალიან უჭირს მაღალი ფასების პირობებში მიწის დამუშავება, ამიტომ რჩება ერთადერთი არჩევანი - ან შეეგუონ სიღარიბეს ან გაიქცნენ საქართველოდან.

„ფასები მაღალია, ანაზღაურება არ არის შესაბამისი. ჩვენ გვინდა, რომ „ქართულმა ოცნებამ“ ამაზე დააფიქსიროს პოზიცია ან ერთად ვისაუბროთ საკითხის გადაწყვეტაზე. თუ ყველაფერი კარგად არის ქვეყანაში, რატომ გარბის საქართველოს მოქალაქე ქვეყნიდან?! ადამიანები საქართველოდან უცხოეთში მიდიან ყველაზე მძიმე სამუშაოების შესასრულებლად. „ქართული ოცნებასთან“ დაკავშირებული ადამიანები მდიდრდებიან, საქართველოს რიგითი მოქალაქეები - ღარიბდებიან. ეს არის უსამართლობა. იქნებ ვინმემ გვიპასუხოთ, რატომ არის საქართველოში სურსათი უფრო ძვირი, ვიდრე მეზობელ ქვეყანაში თუ არ არის ქვეყანაში კორუფცია“, - განაცხადა პაატა მანჯგალაძემ, რომლის განცხადებასაც პარტიის პრესსამსახური ავრცელებს.