მადლობას ვუხდი ინდოეთის პრემიერ-მინისტრს უკრაინის ტერიტორიული მთლიანობის მხარდაჭერისთვის. ამის შესახებ უკრაინის პრეზიდენტი ვოლოდიმირ ზელენსკი ინდოეთის პრემიერ-მინისტრ, ნარენდრა მოდისთან გამართული სატელეფონო საუბრის შემდეგ “ტელეგრამის” პირად არხზე წერს.

“სატელეფონო საუბარი მქონდა ინდოეთის პრემიერ-მინისტრთან ნარენდრა მოდისთან.

მადლობას გიხდით უკრაინის სუვერენიტეტისა და ტერიტორიული მთლიანობის მხარდაჭერისთვის, ჰუმანიტარული დახმარებისთვისა და იდოეთის წარმომადგენლების აქტიური მონაწილეობისთვის მრჩევლების დონეზე შეხვედრებში”, - წერს ზელენსკი.

უკრაინის პრეზიდენტმა, ასევე, აღნიშნა, რომ უკრაინისთვის მნიშვნელოვანია ინდოეთის მონაწილეობა საინაუგურაციო მშვიდობის სამიტში, რომლის ჩატარებაც შვეიცარიაში არის დაგეგმილი.

ცნობისთვის, 20 მარტს გამოცემა Reuters-მა წყაროებზე დაყრდნობით ინფორმაცია გაავრცელა, რომ უკრაინის საგარეო საქმეთა მინისტრი დმიტრო კულება ინდოეთს მომავალ კვირას ეწვევა.