ნოვრუზ-ბაირამის დღესასწაული კიდევ ერთი შეხსენება არის იმის, თუ რამდენად დიდი მნიშვნელობა აქვს საქართველოში მცხოვრები ეთნიკური უმცირესობების კულტურის დაცვასა და პოპულარიზაციას ინკლუზიური, ტოლერანტული გარემოს შესაქმნელად, სადაც თითოეული მოქალაქე თავს დაფასებულად იგრძნობს, - ამის შესახებ საქართველოს სახალხო დამცველმა ლევან იოსელიანმა მარნეულში, ნოვრუზ-ბაირამის აღსანიშნავ სადღესასწაულო ღონისძიებაზე განაცხადა.

„ეთნიკურ უმცირესობათა კულტურის აღიარება და შენარჩუნება ჩვენთვის ის ერთ-ერთი იარაღია, რომელიც საზოგადოების თითოეულ წევრს ერთმანეთთან დააკავშირებს და ხელს შეუწყობს სოციალურ ერთიანობასა და მრავალფეროვნებას“,-განაცხადა ლევან იოსელიანმა.

აღმოსავლური ერების დიდი ნაწილი 21 მარტს გაზაფხულის ბუნიობას - ნოვრუზ ბაირამს აღნიშნავს. საქართველოში ნოვრუზი სახალხო დღესასწაულად 2010 წლიდან გამოცხადდა და იგი ტრადიციულად, ეთნიკური ხასიათის ღონისძიებებით აღინიშნება.