ბელგია გაყინული რუსული აქტივებიდან მიღებული შემოსავლების უკრაინის მხარდასაჭერად გამოყენების წინადადებას მიესალმება, - ამის შესახებ ბელგიის პრემიერ-მინისტრმა, ალექსანდრ დე კრომ განაცხადა.

„ეს კარგი წინადადებაა. ვფიქრობ, რომ ამის გაკეთების გონივრულ გზას წარმოადგენს. იდეა, რომ თანხები, ძირითადად, იარაღის შესაძენად გამოიყოს, აბსოლუტურად ლოგიკურია“, - განაცხადა ალექსანდრ დე კრომ.

ალექსანდრ დე კრომ აღნიშნა, რომ ევროკავშირის სხვა ლიდერებისგან ამ შეთავაზების შესახებ მხოლოდ დადებითი კომენტარები მოისმინა.

ცნობისთვის, გუშინ, ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, ჯოზეფ ბორელმა ევროკავშირის წევრ ქვეყნებს შესთავაზა, რომ ევროპაში გაყინული რუსული აქტივებიდან მიღებული შემოსავლების 90% უკრაინისთვის, ევროპის მშვიდობის ფონდის ფარგლებში, იარაღის შესაძენად გამოიყენონ.