ჩინეთზე აშშ-სა და ევროკავშირის უპრეცედენტო ზეწოლა გრძელდება, მათ შორის ჩვენთან ურთიერთობის კონტექსტში, - ამის შესახებ კრემლის პრესსპიკერმა, დიმიტრი პესკოვმა განაცხადა.

„რა თქმა უნდა, ჩინეთზე აშშ-სა და ევროკავშირის უპრეცედენტო ზეწოლა გრძელდება, მათ შორის ჩვენთან ურთიერთობის კონტექსტშიც. ეს, რა თქმა უნდა, გარკვეულ პრობლემებს ქმნის, მაგრამ ჩვენი სავაჭრო-ეკონომიკური ურთიერთობების შემდგომი განვითარებისთვის დაბრკოლება ვერ გახდება“, - განაცხადა პესკოვმა.

დიმიტრი პესკოვი რუსულ მედიაში გავრცელებულ ინფორმაციას გამოეხმაურა, რომლის მიხედვით, აშშ-ის სანქციების შიშით ზოგიერთმა ჩინურმა ბანკმა რუსეთიდან ჩინურ იუანში ტრანზაქციების განხორციელება შეწყვიტა.

„ჩინეთთან ურთიერთობების უმაღლესი დონისა და ჩვენი ურთიერთობების განსაკუთრებული ხასიათიდან გამომდინარე, ამ სირთულეების დასაძლევად საჭირო შესაძლებლობები გვაქვს“, - აღნიშნა კრემლის პრესსპიკერმა.