ევროკავშირი მოწოდებულია, გაზარდოს თავდაცვის მზადყოფნა და შესაძლებლობები, რათა შეესაბამებოდეს მის საჭიროებებსა და ამბიციებს მზარდი საფრთხეებისა და უსაფრთხოების გამოწვევების კონტექსტში, - ამის შესახებ ევროპული საბჭოს დასკვნაშია აღნიშნული, რომელიც ორდღიანი სამიტის პირველი დღის დასრულების შემდეგ გამოქვეყნდა.

დოკუმენტში აღნიშნულია, რომ ევროკავშირი მოწოდებულია შეამციროს სტრატეგიული დამოკიდებულებები და გაზარდოს თავისი შესაძლებლობები.

„ევროპული თავდაცვის ტექნოლოგიური და სამრეწველო ბაზა კავშირის მასშტაბით შესაბამისად უნდა გაძლიერდეს. თავდაცვის მზადყოფნის გაზრდა და კავშირის სუვერენიტეტის გაძლიერება მოითხოვს დამატებით ძალისხმევას, წევრი სახელმწიფოების კომპეტენციების შესაბამისად, რათა: შეასრულონ ერთობლივი ვალდებულება თავდაცვის ხარჯების არსებითად გაზრდის მიმართ და ერთად უკეთ და სწრაფად ინვესტირება მოახდინონ; გააუმჯობესონ ევროპის თავდაცვის ინდუსტრიის ხელმისაწვდომობა სახელმწიფო და კერძო ფინანსებზე“, - აღნიშნულია დოკუმენტში.

ამ კონტექსტში, ევროპული საბჭო იწვევს საბჭოს და კომისიას, გამოიკვლიონ დაფინანსების მობილიზების ყველა ვარიანტი და წარადგინონ მოხსენება ივნისამდე. გარდა ამისა, საბჭო იწვევს ევროპის საინვესტიციო ბანკს, მოერგოს თავდაცვის ინდუსტრიის დაკრედიტების პოლიტიკას და ორმაგი დანიშნულების საქონლის ამჟამინდელ დეფინიციას.

„ევროპის თავდაცვის მზადყოფნის გაზრდის ძირითად ელემენტად „სტრატეგიული კომპასის“ განხორციელება რჩება და ის უნდა დაჩქარდეს. ევროკავშირის სწრაფი განლაგების შესაძლებლობებს, სამხედრო მობილურობას, წვრთნებს, კოსმოსური უსაფრთხოების გაძლიერებას, კიბერ და ჰიბრიდული საფრთხეებისთვის წინააღმდეგობის გაწევას და საინფორმაციო მანიპულირებისა და ჩარევის პრობლემის გადაჭრას ამ მხრივ განსაკუთრებული მნიშვნელობა აქვს“, - აღნიშნულია დოკუმენტში.

ევროპული საბჭო ხაზს უსვამს, რომ უსაფრთხოებისა და თავდაცვის სფეროში უფრო ძლიერი და ქმედუნარიანი ევროკავშირი დადებითად შეუწყობს ხელს გლობალურ და ტრანსატლანტიკურ უსაფრთხოებას და ავსებს ნატო-ს, რომელიც, მისი წევრებისთვის, კოლექტიური თავდაცვის საფუძველია.