„გორმედის“ სამედიცინო ცენტრში დაუნის სინდრომის დღისადმი მიძღვნილი ღონისძიება გაიმართა

21 მარტს, „გორმედის“ სამედიცინო ცენტრში დაუნის სინდრომის მსოფლიო დღისადმი მიძღვნილი ტრადიციული ღონისძიება გაიმართა - მოეწყო სპეციალური სივრცე და მუსიკისა და ბევრი ფერადი ბუშტით დაუნის სინდრომის მქონე პაციენტებს საჩუქრები გადაეცათ.

ამის შესახებ ინფორმაციას „გორმედი“ ავრცელებს.

„მივესალმები ამ დღის შესახებ ცნობიერების ამაღლების მიზნით გამართულ ყველანაირ ღონისძიებას. სოციუმისთვის ეს ნამდვილად საჭიროა, თუმცა ამ ბავშვებს არ სჭირდებათ აფიშირება. ჩვენ კარგად ვიცით, რომ ასეთი სინდრომით დაბადებული ბავშვები ძალიან განვითარებულები და წარმატებულები არიან. მინდა, რომ საზოგადოებამ კიდევ უფრო კარგად გაიცნოს განსაკუთრებული ბავშვები. კიდევ ერთხელ ვულოცავ „მზის შვილებს“ მათ დღეს“, - განაცხადა „გორმედის“ სამედიცინო ცენტრის კლინიკურმა დირექტორმა, ხათუნა შრუბმა.

ინფორმაციის თანახმად, 21 მარტს მსოფლიო განსაკუთრებული ბავშვების დღეს აღნიშნავს, ამიტომ, მრავალ ქვეყანაში, მათ შორის საქართველოში, ამ დღეს დაუნის სინდრომის შესახებ ცნობიერების ამაღლების მიზნით სხვადასხვა ღონისძიება იმართება.

კამპანიის წლევანდელი გზავნილია „დავამსხვრიოთ სტერეოტიპები“. დაუნის სინდრომის მსოფლიო დღე - 21 მარტი - გაერთიანებული ერების ორგანიზაციის ეგიდით 2011 წელს ოფიციალურად იქნა მიღებული.