უნდა დამტკიცდეს არის თუ არა ჩვენი სასამართლო სისტემა ევროპული, ამიტომ, დიახ, ევროპული კეთილსინდისიერების ტესტი ყველა მოსამართლემ უნდა გაიაროს,- ამის შესახებ „გამარჯვების კოალიციის“ ერთ-ერთმა ლიდერმა და „სტრატეგია აღმაშენებლის“ თავმჯდომარემ, გიორგი ვაშაძემ „პალიტრანიუსის“ გადაცემაში „360 გრადუსი“ განაცხადა.

გიორგი ვაშაძის თქმით, „ქართული ოცნების“ წარმომადგენლებს საქართველოში დამოუკიდებელი სასამართლოს არსებობა არ უნდათ, რადგან მათ „ხალხის ფული აქვთ მოპარული“.

“„ქართულ ოცნებას“ სამართლიანი სასამართლოსა და კეთილსინდისიერების პრობლემა აქვს. ევროკავშირი ძალიან მარტივ რაღაცას გვეუბნება, სასამართლო, რომელიც დღეს გაქვთ, არ შეესაბამება ევროპულ სტანდარტებს, ამიტომ, დიახ, კეთილსინდისიერების ტესტი ყველა მოსამართლემ უნდა გაიაროს, ევროპული კეთილსინდისიერების ტესტი უნდა გაიაროს. თუ გვინდა, რომ ვიყოთ ევროკავშირის წევრი ქვეყანა, ევროპული ქვეყანა, ამ კონკრეტული ტესტის შედეგად უნდა დამტკიცდეს არის თუ არა ჩვენი სასამართლო სისტემა ევროპული. ესაა მთელი შინაარსი ამ პროცესის, მორჩა. მდინარაძეს რა უნდა ველაპარაკო, როცა მდინარაძეს, კობახიძეს, ღარიბაშვილს, ამ ადამიანებს, რომლებსაც ძალიან ბევრი აქვთ მოპარული, ხალხის ფული აქვთ ჯიბეში ჩადებული. მათ ნამდვილად არ უნდათ თავისუფალი სასამართლო, დამოუკიდებელი და მიუკერძოებელი მართლმსაჯულება“, - განაცხადა გიორგი ვაშაძემ.

რაც შეეხება საპარლამენტო არჩევნებს, გიორგი ვაშაძის განცხადებით, დღეს საქართველოში ცვლილებები გადაწყვეტილება საზოგადოებას მიღებული აქვს.

„საზოგადოებას აღარ უნდა, რომ ივანიშვილის პარტია, „ქართლი ოცნება“ მართავდეს. დავიღალეთ ამ ჭიდაობაში, ყელში ამოვიდა ცრუ დილემები, რაც კარგი ივანიშვილისთვის, ის ცუდია საქართველოსთვის, რაც კარგია საქართველოსთვის, ის ცუდია ივანიშვილისთვის. რაც შეეხება იმას, ვინ არის ალტერნატივა, ალტერნატივაა ყველა ის, ვინც 5%-იან ბარიერს გადალახავს“, - განაცხადა გიორგი ვაშაძემ.