საპარლამენტო პოლიტიკურის ჯგუფის „თავისუფლების" წევრებმა საქართველოს პარლამენტში ქვეყნის პირველი პრეზიდენტის, ზვიად გამსახურდიას სურათი განათავსეს.

დეპუტატებმა ნატო და როსტომ ჩხეიძეებმა გამსახურდიას სურათი სასესიო დარბაზთან არსებულ კედელზე ჩამოკიდეს.

როგორც ნატო ჩხეიძემ აღნიშნა, 2 დღის წინ, ზვიად გამსახურდიას დაბადების დღე იყო და ხელისუფლებამ მას სახელმწიფოებრივ დონეზე პატივი არ მიაგო.

"2 დღის წინ იყო დიდი ქართველი პოლიტიკოსისა და საზოგადო მოღვაწის საიუბილეო თარიღი, რაც ხელისუფლებამ არ შეიმჩნია და პატივი არ მიაგო სახელმწიფოებრივ დონეზე. ეს არც იყო გასაკვირი იმ ხელისუფლებისგან, რომელიც ჯიუტად მისდევს 29 წლის წინ დანერგილ სიყალბეს, რომ დამოუკიდებლობა უნდა გვეზეიმა არა 9 აპრილს, არამედ 26 მაისს.

თბილისში ზვიად გამსახურდიას ძეგლი არ არის და არც პარლამენტშია მისი გამოსახულება. ჩვენ გამოვასწორებთ ამ უკანონობას და ზვიად გამსახურდიას ფოტოს მივუჩენთ იმ ადგილს, რომელიც მას უნდა დაეკავებინა," - განაცხადა ნატო ჩხეიძემ.