ნატო-მ უკრაინისთვის იარაღის მიწოდება გრძელვადიან პერსპექტივაში უნდა უზრუნველყოს, - ამის შესახებ ნატო-ს გენერალურმა მდივანმა, იენს სტოლტენბერგმა ბრიუსელში, ნატო-ს საგარეო საქმეთა მინისტრების შეხვედრის წინ განაცხადა.

„ჩვენ უსაფრთხოების სფეროში უკრაინის საიმედო და პროგნოზირებადი დახმარება გრძელვადიან პერსპექტივაში უნდა უზრუნველვყოთ, რათა ნებაყოფლობით კონტრიბუციას და მოკლევადიან შეთავაზებებს ნაკლებად დავეყრდნოთ და უფრო მეტად ნატო-ს ვალდებულებებს და გრძელვადიან დაპირებებს დავეყრდნოთ“, - განაცხადა იენს სტოლტენბერგმა.

ცნობისთვის, გუშინ, გამოცემა Bloomberg-მა ინფორმაცია გაავრცელა, რომ იენს სტოლტენბერგი უკრაინისთვის 100 მილიარდი აშშ დოლარის ოდენობის ფონდის შექმნის იდეით გამოვიდა. მოსალოდნელია, რომ დღეს, ნატო-ს საგარეო საქმეთა მინისტრები გენერალური მდივნის იდეას განიხილავენ.