რაც გუშინ ბექა ოდიშარიამ იკადრა საქართველოს პარლამენტში, ეს არის იმის შედეგი, რომ თავის დროზე ირაკლი ბერაია არ დაისაჯა და ის ისევ არის საქართველოს პარლამენტის წევრი და ისევ იკავებს თავდაცვის კომიტეტის თავმჯდომარის პოსტს, - ამის შესახებ „მოქალაქეების“ ერთ-ერთმა ლიდერმა, ქეთევან თურაზაშვილმა პარლამენტის პლენარულ სხდომაზე განაცხადა.

ამასთან, როგორც დეპუტატმა აღნიშნა, კვოტირების გაუქმების ინიციატივა „ქართულმა ოცნებამ“ ოპოზიციის დასაპირისპირებლად გამოიყენა.

„ასეთი საქციელი „ქართული ოცნების“ მხრიდან, რა თქმა უნდა, ახალისებს ძალადობას და ქალებზე თავდასხმას და მათ იციან, რომ რაც არ უნდა თქვან, როგორი სიძულვილიც არ უნდა გამოავლინონ, მათ პასუხს არავინ მოსთხოვს. რაც შეეხება „გირჩის“ ინიციატივას, რომელიც „ქართულმა ოცნებამ“ ზარ-ზეიმით აიტაცა, ემსახურება არა მხოლოდ პოლიტიკაში ქალთა შემცირებას და ბოლოს საერთოდ გაქრობას, ნაკლებად მოტივირებულ და ნაკლებად ძლიერ ქალს, არამედ „ქართულმა ოცნებამ“ ეს ინიციატივა ძალიან ეფექტურად გამოიყენა ოპოზიციის დასაპირისპირებლად. რაც დღეს ჩვენ დარბაზში ვნახეთ, სწორედ „ქართული ოცნების“ ამ ინიციატივის ატაცების შედეგი იყო. ამიტომ, მინდა მივმართო ჩემს ოპოზიციონერ კოლეგებს, გადავდოთ წყენა, რადგან ახლა ჩვენი ქვეყნისთვის ოპოზიციის ერთობა უმნიშვნელოვანესია. თუ გვინდა, რომ ჩვენი ქვეყანა გადავარჩინოთ, ახლა ჩხუბი არ შეიძლება არანაირ საკითხზე, დღეს წყდება ჩვენი ქვეყნის განვითარების და მომავლის ბედი, ამიტომ დავდგეთ ერთად, რომ უფრო ეფექტურად მოვიგოთ ბრძოლა“, - განაცხადა ქეთი თურაზაშვილმა, რომლის კომენტარსაც პარტია „მოქალაქეები“ ავრცელებს.