„ქართული ოცნება“ რომ სხვისი ფინანსების გაუმჭვირვალობაზე საუბრობს, უბრალოდ ძალიან დიდი კომედიაა. ადამიანები ამის მასშტაბს რომ ხედავდნენ, ჩემი აზრით, სიცილისგან ჩაბჟირდებოდნენ, - ამის შესახებ "გირჩის" დეპუტატმა, იაგო ხვიჩიამ "უცხოური გავლენების გამჭვირვალობის" შესახებ კანონპროექტზე საუბრისას განაცხადა.

მისივე თქმით, არასამთავრობო ორგანიზაციები"ათასგვარ უაზრო რეპორტებს და ანგარიშებს ამზადებენ" და დარწმუნებულია, რომ მთავრობას მათი ფინანსური გამჭვირვალობის შესახებ ინფორმაცია აქვს.

"შენ რომ "ქოცი" ხარ და შენი ფინანსები ისეთია, როგორიცაა და სხვის გაუმჭვირვალობაზე ლაპარაკობ, მით უმეტეს, ამერიკული ან დასავლური ორგანიზაციების, რომლებიც ათასგვარ რეპორტებს აწერინებენ [NGO-ებს], მათ შორის, ხშირად არასაჭიროს და მაგ ხალხზე რომ ამბობ, იმათი გაუმჭვირვალეა და ჩემი გამჭვირვალეო, ჩემთვის არ არის დამაჯერებელი და უფრო მეტი, სასაცილოც არის," - განაცხადა ხვიჩიამ.

რაც შეეხება ოპოზიციის ალტერნატიულ კანონპროექტს, ხვიჩია აღნიშნავს, რომ ესეც "რუსული კანონია".

"ჩემი აზრით, ეს ისეთივე რუსული კანონია, როგორიც "ქოცების" შემოგდებული კანონი. თუ შენ ასეთ აკრძალვას შემოიღებ, რუსები წავლენ და ამერიკის გავლით შემოიტანენ საქართველოში ფულს," - აღნიშნა ხვიჩიამ.