პროკურატურას პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებულ ლაზარე გრიგორიადისის საქმეზე გამამტყუნებელი განაჩენის მოლოდინი აქვს.

როგორც საქმის პროკურორმა თამარ იაკობიძემ სხდომის დაწყებამდე განაცხადა, სასამართლოში არაერთი მტკიცებულება აქვთ წარმოდგენილი.

„დღევანდელ სასამართლო პროცესზე ბრალდების მხარე მიმოიხილავს ყველა იმ მტკიცებულებას, რომელიც სასამართლოში საქმის არსებითი განხილვისას წარვადგინეთ. პროცესი დასკვნითი სიტყვის ეტაპზეა. თითოეული მტკიცებულების, რაც სასამართლოში იყო წარდგენილი, როგორც ვიდეოჩანაწერები, ასევე ექსპერტიზის სხვადასხვა დასკვნა, მოწმეთა ჩვენებები, ანალიზი განხორციელდება დღევანდელ სხდომაზე. ბრალდების მხარის შეფასებით, საქმეზე არაერთი პირდაპირი მტკიცებულებაა, ვიდეოჩანაწერთან მიმართებაში არაერთი ექსპერტიზაა ჩატარებული, მნიშვნელოვანი გარემოებაა ის, რომ მოცემულ საქმეზე თვითმხილველი მოწმეებიც არიან დაკითხული",- განაცხადა იაკობიძემ.

ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა.

გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“.

ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა.

ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს.

7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული.