ბიუროს სხდომა უმრავლესობის მხრიდან გამოყენებული იყო ერთ დიდ დეზინფორმაციის წყაროდ - ამათი სიტყვის უკვე აღარავის სჯერა, თვითონ აღარ სჯერათ თავისი სიტყვის, - ამის შესახებ პარტია „გახარია საქართველოსთვის“ დეპუტატმა, ბექა ლილუაშვილმა ჟურნალისტებთან საუბრისას განაცხადა.

მისივე თქმით, „ქართული ოცნების“ მთავარი პოლიტიკური ამოცანაა, არჩევნების წინ, პარტნიორების და არასამთავრო ორგანიზაციების დისკრედიტაცია მოახდინონ.

„მთელი ეს ბიუროს სხდომა უმრავლესობის მხრიდან, კრებსითი თუ კოლექტიური „ქართული ოცნების“ მხრიდან გამოყენებული იყო ერთ დიდ დეზინფორმაციის წყაროდ. ხალხი გამოდის და თავის სიტყვას იშველიებს არგუმენტად. სასაცილოა, უბრალოდ. ამათი სიტყვის უკვე აღარავის სჯერა, თვითონ აღარ სჯერათ თავისი სიტყვის. გამოდიან და ვითომ მე ვიყავი, როცა თქვეს, რომ ეს მკაფიო პოლიტიკური გადაწყვეტილებაა და ამ საკითხს არც დღეს და არც მომავალში აღარ მივუბრუნდებითო. სამარცხვინოა ასეთი ხალხისგან დღეს თავისი სიტყვის მოშველიება რაიმეს არგუმენტად. არც გამჭვირვალობა აინტერესებს სინამდვილეში, არც რეალურად მტრულად განწყობილი სახელმწიფოების გავლენებთან ბრძოლა. სინამდვილეში არჩევნების წინ მათი მთავარი პოლიტიკური ამოცანაა, მოახდინონ ჩვენი პარტნიორების და მათ შორის, არასამთავრო ორგანიზაციების დისკრედიტაცია," - განაცხადა ლილუაშვილმა.