როგორი კანონპროექტიც არ უნდა იყოს დაინიცირებული, მნიშვნელოვანია, რომ არცერთმა კანონპროექტმა ბარიერი არ შექმნას ჩვენ ევროპულ გზაზე, ჩვენ ევროპულ პერსპექტივაზე და ევროპულ მომავალზე, - ამის შესახებ სახალხო დამცველმა, ლევან იოსელიანმა ჟურნალისტებს განუცხადა, როდესაც ისაუბრა „უცხოური გავლენის გამჭვირვალობის შესახებ“ კანონპროექტზე.

მისი თქმით, გამჭვირვალობა არის ლეგიტიმური მიზანი, მაგრამ ამის მიღწევის სხვა ბევრი გზა არსებობს, მათ შორის სხვა კანონმდებლობაში ცვლილებების შეტანის შესაძლებლობა.

„როგორც ვიცი, ერთ-ერთმა პარტიამ დააინიცირა კიდეც ინიციატივა. ამიტომ ეს არის მთავარი ამოსავალი პრინციპი, როგორი კანონმდებლობაც არ უნდა იყოს, ის არ უნდა გახდეს ბარიერი. რა თქმა უნდა, ის, რომ ამ ქვეყანაში ყველა, ვინც პასუხისმგებელია საჯარო პოლიტიკაზე უნდა ახდენდეს თავისი შემოსავლის გამჭვირვალობას, ამას ყოველთვის ვემხრობოდი, როცა პარლამენტში ვიყავი“, - განაცხადა იოსელიანმა.