საკონსულოზე თავდასხმისთვის ისრაელი უნდა დაისაჯოს, - ამის შესახებ ირანის უზენაესმა ლიდერმა, აიათოლა ალი ხამენეიმ განაცხადა.

„როდესაც ისინი საკონსულოს თავს დაესხნენ, თითქოს თავს ჩვენს მიწას დაესხნენ. ბოროტმა რეჟიმმა შეცდომა დაუშვა და უნდა დაისაჯოს და იგი დაისჯება“, - განაცხადა აიათოლა ალი ხამენეიმ.

ასევე, ირანის უზენაესმა ლიდერმა, ღაზაში „ჰამასის“ წინააღმდეგ ომში ისრაელის მხარდაჭერისთვის დასავლეთის სახელმწიფოები გააკრიტიკა.

შეგახსენებთ, 1-ელ აპრილს, სირიის დედაქალაქ დამასკოში, ირანის საკონსულოს შენობაზე სარაკეტო დარტყმა განხორციელდა. ირანი თავდასხმაში ისრაელს ადანაშაულებს. ირანის სახელმწიფო მედიის ცნობით, 13 ადამიანი დაიღუპა. ირანის ხელისუფლებაში აცხადებენ, რომ ირანის ისლამური რევოლუციის გვარდიის 7 წევრი, მათ შორის ორი გენერალი, დაიღუპა.