პარლამენტთან მიმდინარე აქციას სტუდენტების კიდევ ერთი ნაწილი შეუერთდა

„არა რუსეთს, ჩვენ ვირჩევთ ევროპას“ - ამ სლოგანით პარლამენტთან მიმდინარე აქციას სხვადასხვა უნივერსიტეტის სტუდენტების კიდევ ერთი ნაწილი შეუერთდა.

აქციაზე, რომელიც „უცხოური გავლენის გამჭვირვალობის შესახებ“ კანონპროექტის საწინააღმდეგოდ მიმდინარეობს, სტუდენტებმა ბანერი წარწერით: „კი ევროპას! არა რუსულ კანონს“ მიიტანეს. ასევე მიტანილი აქვთ ბანერები: „სტუდენტები რუსული კანონის წინააღმდეგ“, „სირცხვილია“.

„ზოგადად ამდენი სტუდენტი რომ გამოვიდა დილიდან აუდიტორიიდან და გადაწყვიტა შეერთებოდა პარლამენტთან მიმდინარე აქციას, ნიშნავს, რომ ახალგაზრდები ხელისუფლების ამგვარ ნაბიჯებს არ შეეგუებიან. ჩვენი ფიზიკური ბრძოლით მოპოვებული გამარჯვება თავზე გადაგვახიეს და ბრძოლა იქნება უკომპრომისო“, - აცხადებს სტუდენტი ნიკო მანაგაძე.

ცნობისთვის, საქართველოს პარლამენტის უკანა შესასვლელთან სამოქალაქო ორგანიზაციებისა და მედიის წარმომადგენლები აქციას მართავენ. აქციაზე მყოფები აპროტესტებენ კანონპროექტს „უცხოური გავლენის გამჭვირვალობის შესახებ“ , რომელსაც იურიდიულ საკითხთა კომიტეტი, პირველი მოსმენით განიხილავს.