ზაპოროჟიეს ატომურ ელექტროსადგურს ბირთვული ინციდენტის საფრთხე ემუქრება, - ამის შესახებ ატომური ენერგიის საერთაშორისო სააგენტოს (IAEA) გენერალურმა დირექტორმა, რაფაელ გროსიმ გაერო-ს უშიშროების საბჭოს განუცხადა.

„ჩვენ ბირთვულ ინციდენტს ვუახლოვდებით. ეს თავდასხმები დაუყოვნებლივ უნდა შეწყდეს“, - განაცხადა რაფაელ გროსიმ.

რაფაელ გროსიმ აღნიშნა, რომ 7 აპრილს დრონების გამოყენებით განხორციელებული თავდასხმის შედეგად მთავარი რეაქტორის სტრუქტურა დაზიანდა.

„სტრუქტურის დაზიანება ზედაპირული იყო, მაგრამ თავდასხმა ძალიან საშიშ პრეცედენტს ქმნის. საბედნიეროდ, მას რადიოლოგიური ინციდენტი არ მოჰყვა, მაგრამ ეს რისკს მნიშვნელოვნად ზრდის, რადგან ბირთვული უსაფრთხოება უკვე საფრთხის ქვეშ არის“, - აღნიშნა რაფაელ გროსიმ.

შეგახსენებთ, ევროპაში ყველაზე დიდი ატომური ელექტროსადგური რუსებმა 2022 წლის მარტში დაიკავეს.