„არა რუსულ კანონს“ - ამ სლოგანით ახალგაზრდები მსვლელობით კვლავ რუსთაველის გამზირზე, პარლამენტთან დაბრუნდნენ. საკანონმდებლო ორგანოსთან მათ ხალხი დახვდა, რომლებიც პარლამენტთან დაბრუნებულ ახალგაზრდებს ტაშით შეხვდნენ.

„უცხოური გავლენის გამჭვირვალობის შესახებ“ კანონპროექტის საწინააღმდეგო აქცია კვლავ პარლამენტის წინ გრძელდება. რუსთაველის გამზირი გადაკეტილია, მოქალაქეები სკანდირებენ „არა რუსულ კანონს“. „საქართველო“.

ცნობისთვის ახალგაზრდები დღეს, თავდაპირველად პარლამენტის შენობასთან შეიკრიბნენ, ამის შემდგომ კი, მსვლელობით იუსტიციის სახლთან გადაინაცვლეს, რის შემდეგაც ასევე მსვლელობით გაემართნენ გმირთა მოედანზე. მათ გმირთა მოედანზე ფიცი დადეს, რაც მათივე თქმით, არის პირობა იმისა, რომ „უცხოური გავლენის გამჭვირვალობის შესახებ” კანონპროექტს ხელისუფლება ვერ მიიღებს.