„ხელს აფარებთ მკვლელებს“, „ხელისუფლება ჩემი მეტრია“ - ამ შინაარსის პლაკატებით, გორის მუნიციპალიტეტის სოფელ ხელთუბანში, 6 წლის წინ გარდაცვლილი თორნიკე მერებაშვილის მშობლები “ქართული ოცნების“ თავმჯდომარეს, ირაკლი ღარიბაშვილს გორის თეატრთან დახვდნენ, სადაც „ქართული ოცნების" ლიდერები ადგილობრივი ორგანიზაციების ხელმძღვანელებს და პარტიულ აქტივს ხვდებოდნენ.

გარდაცვლილის მამის, მერაბ მერებაშვილის განცხადებით, ოჯახი დღემდე უშედეგოდ ითხოვს ობიექტურ გამოძიებას.

შემთხვევა 2018 წლის 6 ივლისს საღამოს მოხდა. ოფიციალური ვერსიით, 20 წლის ახალგაზრდას, სოფელ ხელთუბანში, საავტომობილო გზაზე მოძრავი ავტომანქანა დაეჯახა, რაც გარდაცვალების მიზეზი გახდა.

აღნიშნული ბრალდებით ერთი სასჯელს ერთი პირი იხდიდა, თუმცა გარდაცვლილის ოჯახს გამოძიების ამ ვერსიის არ სჯერა და აცხადებენ, რომ მერებაშვილის გარდაცვალების მიზეზი ავტოსაგზაო შემთხვევა არ გამხდარა და იგი მოკლეს.

გარდაცვლილის ოჯახს ირაკლი ღარიბაშვილი პარტიულ აქტივთან გამართული შეხვედრის დასრულების შემდეგ შეხვდა და ესაუბრა.