პარტია „ლელოს“ წევრის, ვატო სურგულაძის განცხადებით, „ქართულმა ოცნებამ“ „უცხოური გავლენის გამჭვირვალობის შესახებ“ კანონპროექტი კიდევ ერთხელ იმიტომ წარადგინა, რადგან 2024 წლის არჩევნებში წაგების ეშინიათ. ამის შესახებ მან თბილისის საკრებულოს სხდომაზე სიტყვით გამოსვლისას განაცხადა.

„როცა კანდიდატის სტატუსი მოგვანიჭეს, მეგონა, რომ მართლა არ გვექნებოდა ასეთი სხდომები. { თქვენგან განსხვავებით} ჩვენ გვაქვს ძალიან განსხვავებული ღირებულებები, ჩვენ აბსოლუტურად სხვადასხვანაირად გვესმის რა არის ევროპა, რა არის ევროპული ღირებულება.

შევარდნაძემ ჩამოაყვანინა ნახევარი აჭარა, მიხეილ სააკაშვილმა „დინამოს“ სტადიონი გაავსო, იგივეს აკეთებთ თქვენც. დაშინებით მოგყავთ ბაღის პედაგოგები, სკოლის პედაგოგები.

მეგობრებო, ამ ევროპის ირგვლივ მაინც გავერთიანდეთ, რა საჭირო იყო საერთოდ ამ კანონის ახლა წამოწევა? - საჭიროება ის იყო, რომ ალბათ, ზუსტად რომ გეშინიათ, რომ წააგებთ შემდეგ არჩევნებს. არ არის პრობლემა არჩევნების წაგება. მთავრობები მოდიან და მიდიან“, - განაცხადა სურგულაძემ.