შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის კანონაღსრულებისა და საზღვაო უსაფრთხოების ტაქტიკური განყოფილებების 14 და სწრაფი რეაგირების მთავარი სამმართველოს 16 მოსამსახურეს, საქართველოს სასაზღვრო პოლიციის სანაპირო დაცვის ფოთის ბაზაზე სპეციალური სწავლება ჩაუტარდათ.

სასაზღვრო პოლიციის მიერ გავრცელებული ინფორმაციით, სწავლება დიდი ბრიტანეთის სამეფო საზღვაო ფლოტის საზღვაო ქვეითთა სარდლობის სპეციალური დანიშნულების ქვედანაყოფის (42 CDO) ინსტრუქტორების ორგანიზებით განხორციელდა.

„სწავლება მოიცავდა: დანაყოფის საბრძოლო მედიკოსის ტრენინგს, აბორდაჟის პროცედურების ჩატარებას განსხვავებული ხილვადობის პირობებში, ახლო დისტანციაზე ბრძოლის ტაქტიკურ მანევრებს და საცეცხლე მომზადებას. კურსის მონაწილეებს თეორიული საკითხების პრაქტიკაში განხორციელების საშუალებაც ჰქონდათ. სწავლების დასასრულს, ტრენინგში მონაწილე პირადი შემადგენლობის შესაბამისი სერტიფიკატებით დაჯილდოების ცერემონია გაიმართა, რომელშიც მონაწილეობა მიიღეს ბრიტანეთის ელჩმა საქართველოში მარტკ კლეიტონმა, ბრიტანეთის თავდაცვის ატაშემ საქართველოში, სომხეთსა და აზერბაიჯანში, სტივ ქუანთრილმა, სასაზღვრო პოლიციის სანაპირო დაცვის დეპარტამენტის დირექტორმა რამაზ პაპიძემ და სწრაფი რეაგირების მთავარი სამმართველოს ხელმძღვანელმა პირებმა. აღნიშნული სწავლება რიგით მეორედ ტარდება საქართველოში, რომელიც ითვალისწინებს გამოცდილების გაზიარებასა და სწავლებაში ჩართული ქვედანაყოფების მოსამსახურეთა ტაქტიკური შესაძლებლობების გაზრდა-განვითარებას“, - ნათქვამია უწყების მიერ გავრცელებულ ინფორმაციაში.