აშშ-ის პრეზიდენტმა, ჯო ბაიდენმა ეგვიპტის პრეზიდენტ აბდელ-ფატაჰ ელ-სისისთან და კატარის ემირ შეიხ ტამიმ ბინ ჰამად ალ-ტანთან სატელეფონო საუბარი გამართა და დაადასტურა, რომ სამი ქვეყანა ღაზაში ცეცხლის შეწყვეტის შესახებ შეთანხმების პირობების სრულად შესრულების უზრუნველყოფაზე იმუშავებს, თუ ისრაელი და „ჰამასი“ ასეთ შეთანხმებას მიაღწევენ.

თეთრი სახლის ინფორმაციით, ჯო ბაიდენმა ეგვიპტისა და კატარის ლიდერებს განუცხადა, რომ მძევლების საკითხი ახლა ერთადერთი დაბრკოლებაა ცეცხლის დაუყოვნებელი შეწყვეტისა და ღაზაში მშვიდობიანი მოსახლეობისთვის დახმარების მიწოდებისთვის.

„ლიდერებმა განიხილეს მძევლების გათავისუფლების შესახებ გარიგება, რომელთან დაკავშირებითაც მოლაპარაკებები მიმდინარეობს, ასევე ღაზის სექტორისთვის დახმარების გაზრდის მცდელობები“,- აღნიშნულია თეთრი სახლის ინფორმაციაში.